Navrae Hier
Ek het n droom . . . en drome word soms 'n werklikheid!

(deur Michael Lutzeyer, eienaar en hoofbestuurder van Grootbos Private Natuurreservaat)

Dit was die uitsig wat my oombliklik oorrompel het. Daardie skouspelagtige panoramiese vergesig oor Walkerbaai . . . tot by Valsbaai in die verte . . . Dit het my summier uitgeboul toe ons in Mei 1991 die eerste keer Grootbos toe gekom en op my toekomstige eiendom gestaan het. Die verruklike omgewing met bont spatsels veldblomme wat oral glinster in die son, groen fynbos-velde en ou Melkhoutwoude het my laat voel asof ek in die paradys beland het.

Ek is in 1952 in Kaapstad gebore nadat my ouers in 1951 van Duitsland na Suid-Afrika gemigreer het. N skool het ek 'n jaar lank diensplig in die Suid-Afrikaanse Weermag gedoen en toe is ek Duitsland toe, waar my ouers se wortels l. Daar het ek 'n vakleerlingskap voltooi en onder meer 'n koffiewinkel bestuur en as verkoopsverteenwoordiger gewerk by 'n maatskappy wat masjinerie vervaardig.

Na 13 jaar in Duitsland het my verlange na die Suid-Afrikaanse son en wye, oop vlaktes my uiteindelik teruggelok na my geboorteland. Ek het in die middel tagtigerjare by die maatskappy Nordson Atlanta begin werk en was verantwoordelik vir die invoer van masjinerie vir die verpakkingsbedryf. In 1991 het ek die grondslag vir my nuwe loopbaan - en 'n nuwe lewe - gel toe ek die plaas Grootbos naby Gansbaai gekoop het.

Van my vriende het gedink ek is heeltemal die kluts kwyt toe ek uit die bloute my vorige lewe vaarwel toeroep en sak en pak met my gesin na Grootbos verhuis. 'n Vervalle ou plaashuis op 'n waardelose stuk grond - hoe op aarde kan 'n mens 'n gewilde natuurreservaat en 'n vyfster-lodge uit niks tot stand bring? Dit was beslis 'n groot waagstuk. Almal wat Suid-Afrika besoek, wil eksotiese diere soos olifante of leeus van naderby sien. Ons kan hulle nie die Groot Vyf wys nie. Ons het net bobbejane, bosbokke, rooikatte, spinnekoppe, slange, skerpioene, verskeie soorte vols en baie verskillende blomplante. Geen normale mens gaan tog oor die 10 000 km afl net om dt te sien nie? Nog minder om 'n klomp klein blommetjies te sien . . .

'n Stukkie paradys op my voorstoep
Jare later het ek eers besef dat dìt wat my die meeste van die gebied geboei het, reg voor my voordeur groei. 'n Stokperdjie om fynbos-plante vir die kommersiële mark te kweek, het my groot waardering gegee vir die komplekse simbiotiese verhouding tussen die plante, insekte en diere wat ook 'n tuiste op my plaas gevind het. Die voortdurende toeloop van vriende en familie wat op Grootbos kom uitspan het, was 'n klinkklare bewys dat ek 'n stukkie goud gevind het. Teen 1995 het die plaashuis reeds te klein geword om al die gaste en besoekers te huisves en het ons begin om vyf gastehuise vir bykomende huisvesting te bou.
 
Hierna was dit kinderspeletjies om my broer Tertius en sy vrou Gaby te oortuig om hul restaurantbedryf in Duitsland prys te gee en eerder na sonnige Suid-Afrika terug te keer. Met hulle hulp en bystand, asook dié van my vrou, Dorothee, en my ouers Heiner en Eva, het ons stelselmatig begin om 'n juweel van 'n oord in dié skilderagtige fynbos-paradys te vestig. Ons informele selfhelp-rusoord was spoedig só gewild dat ons dit in 'n meer formele oornagplek met bed-en-ontbyt omskep het. Binne die eerste vyf jaar is die oorspronklike plaashuis ook omskep in 'n indrukwekkende ontvangsgebou en het ons nog ses kothuisies, asook private woonhuise, woonkwartiere vir die personeel, perdestalle en stoorkamers gebou. 
Ons visie was uit die staanspoor om iets unieks te skep uit dit wat ons het, al was dit 'n nederige begin. Harde werk, geesdrif, eerlikheid en 'n sterk familieband was die hoeksteen waarop Grootbos se sukses gebou is. Ons oorspronklike plan was nooit om 'n wêreld-befaamde weelderige vyfster-oord te vestig nie. In die eerste paar jaar was ons eerder kliphard besig om die ou verwaarloosde landerye rondom die lodge in 'n skouspelagtige fynbos-tuin te omskep. Dit was in dié tyd dat Sean Privett as fynbos-kenner en botanikus met 'n Meestegraad hom by die Grootbos-span aangesluit en die eerste tuin-argitek en veldgids geword het.
Selfs vandag, wanneer ons op die terras van die Garden Lodge staan en uitkyk oor die verruklike tuine en inheemse blomparadys, kan ons skaars glo dat dit 'n klompie jare gelede net 'n bouvallige bou-aanleg vol rommel was.
 
Bewaring en Opheffing

Ons het weliswaar 'n eko-vriendelike lodge van wêreldgehalte gebou, maar Grootbos gaan oor meer as net weelderige huisvesting - dit gaan veral oor bewaring en opheffing. Ons het nog altyd vernuwend gedink en is geïnspireerd om 'n bydrae te lewer tot die toekoms van Suid-Afrika deur projekte wat mense se kennis en vaardighede slyp. Ons is veral betrokke by ontwikkelingsprojekte vir jongmense uit agtergeblewe gemeenskappe wat nie dieselfde geleenthede as ander gehad het nie.

Die eerste dinamiese ontwikkelingsprojek wat reeds in 2003 deur Grootbos gevestig is, is die unieke Green Futures College. Dié opleidingsprogram word op die reservaat aangebied om werklose mense uit die plaaslike gemeenskap op te lei in fynbos-kweking, tuinboukunde en eko-toerisme. Dit is die eerste projek van dié aard in Suid-Afrika. Die doel is om 'n groep tuiniers uit agtergeblewe gemeenskappe formeel op te lei en te bemagtig met erkende kwalifikasies sodat hulle in die toekoms hul eie professionele ondernemings kan begin. Dié idee kon 'n werklikheid word danksy 'n private/openbare vennootskap wat Grootbos met die Duitse Beleggings- en Ontwikkelingsmaatskappy (DEG) gesluit het. Green Futures is 'n nie-winsgewende organisasie en daarop gemik om 'n blywende verandering en geleenthede vir alle Suid-Afrikaners teweeg te bring.Die kollege genereer 'n volhoubare inkomste deur die plante wat die studente kweek, te verkoop. Daar is ook 'n inheemse plantkwekery en 'n fynbos-tuinaanlegbesigheid op die perseel. Die inkomste uit die plantverkope finansier die kollege se uitgawes vir die volgende jaar en derhalwe is die projek selfonderhoudend. Die sukses van die projek het ons stoutste verwagtinge oortref. Al 23 studente wat in die eerste twee jaar die kursus aangepak het, het hul kwalifikasies verwerf en behalwe een, het almal werk gekry of hul eie onderneming in die kwekerybedryf begin.   

In dié tyd het ons, aangespoor deur 'n toenemende behoefte aan huisvesting by Grootbos, ook besluit om 'n tweede lodge op die reservaat te bou. Dié lodge (Forest Lodge) is in 2004 op die berghange oorkant die oorspronklike Grootbos Lodge gebou en spog met 'n verruklike noord-uitsig. Dit het bestaan uit 'n indrukwekkende hoofgebou, elf vrystaande wooneenhede aan die buitewyke van die Melkhoutwoud en 'n ultra-moderne konferensiesentrum. In 2006 het 'n verwoestende veldbrand die rietdak-hoofgebou en drie wooneenhede in puin gelê. Ons het die skade egter binne 'n rekordtyd van 8 maande herstel en in Oktober 2006 kon Forest Lodge weer sy deure oopmaak - dié keer met 16 luukse-wooneenhede.
 
Unieke Grootbos-ervaring
Dit is nou twee dekades sedert ek Grootbos gekoop het en ons 27 luukse-suites is in die lente en herfs altyd volbespreek. Ons het die oornag-verblyf met ontbyt verander na 'n alles-omvattende vyfster-hoteldiens en bied ook 'n wye verskeidenheid van buitelug-aktiwiteite aan - van jeepsafari's en staproetes deur die eeu-oue Melkhoutwoud en die reservaat tot perdry-ritte op die oord of strand, walviskyk-uitstappies per boot of te voet en uitsigvlugte oor die omgewing vanaf ons eie landingstrook vir diegene wat die skilderagtige landskap en Suidelike Noorkapper-walvisse uit 'n ander oogpunt wil besigtig.  
 
Die unieke Grootbos-ervaring wat ons aan gaste bied - van die asemrowende panoramiese uitsigte, fynproewer-kookkuns en weelderige verblyf tot die persoonlike bekendstelling aan die ongelooflike fauna en flora van dié ongerepte wonder-wêreld - is wat duisende mense hierheen lok en telkemale laat terugkeer.
 
Ons bied egter nie net vyfster-verblyf en eko-vriendelike toeriste-ervarings nie - Grootbos en Green Futures dra ook grootliks by tot die bewaring van Suid-Afrika se pragtige natuurlewe en die daarstelling van 'n kerngesonde omgewing waarin die plaaslike gemeenskappe bemagtig word deur opleiding sodat hulle self werkgeleenthede kan skep.
 
Ons het 'n lang en opwindende pad gestap om Grootbos te kry waar dit vandag is en die reis is nog lank nie voltooi nie. Ongeag of dit nou blote geluk of bestiering was - die verruklike vergesigte vanaf Grootbos het destyds 'n droom laat posvat om iets waardevols te skep uit skynbare niks . . . en in ons geval, is die droom bewaarheid!