Navrae Hier

Die natuur se eie feetjiebos

Fynbos Blomme 2
Fynbos Blomme 3
Grootbos Blomtyd

Min dinge is so verkwikkend vir liggaam en siel as om in die ongerepte natuur te gaan stap waar die mens nog nie 'n spoor gelaat het nie. Die talle voetpaadjies en staproetes op die Grootbos Private Natuurreservaat lei jou letterlik deur 'n sprokieswêreld van magiese Melkhout-woude, kleurvolle veldblom-landskappe en berge en klowe waar 'n magdom voël- en dierespesies jou om elke hoek en draai verras. Die spore van klipspringers, duikers, dassies, molle en skilpaaie is oral in die sandpaadjies sigbaar en as jy gelukkig is, kom jy sommer op 'n hele paar van dié diertjies af.

Die oorspronklike plaas Grootbos is genoem na die digte, bosagtige fynbosplante en boomruigtes wat die hange van die Duynefontein-berge omskep in 'n towertapyt van ewige kleurespel.
 
Die voetpaadjies kronkel deur 'n kaleidoskoop van landskappe  - van blombedekte heuwels en valleie tot oerwoude - en bied asemrowende uitsigte oor die hele Gansbaai-kuslyn met sy ryk seelewe. Dié strook kuslyn tussen Pearly Beach en Walkerbaai is ook wêreld-bekend as die tuiste van die see se Groot Vyf - dolfyne, walvisse, haaie, robbe en pikkewyne - en een van die beste plekke vir haaihok-duik en walviskyk. Dis 'n onvergeetlike belewenis om die kaperjolle van die reusagtige Suidelike Noorkapper-walvisse dop te hou wanneer hulle tot teenaan die kus of bote kom baljaar.
 

Voetslaan-safari's in veldblomvelde

Gaste kan die Grootbos-omgewing te voet op begeleide of onbegeleide staptogte verken. Ons spesialis-gidse weet presies waar om die kleurryke suikerbekkies en die Kaapse Suikervoël met sy ellelange stert tussen die malse verskeidenheid van erica- en protea-spesies aan te tref. Teen die berghange gooi die wye vlerkspan van die Jakkalsvoël en Swart Kuikendief groot skadu's oor die veld waar hulle statig hoog in die lug sweef en skielik afswiep op hul prooi.

Die ongerepte Grootbos-reservaat met sy diverse habitats is 'n paradys vir 'n wye verskeidenheid van seldsame fauna en flora. Sowat eenduisend inheemse fynbos-spesies en 250 voëlsoorte kom algemeen op dié oord van 2 500 hektaar voor.
 
Die dik, knoetserige stamme en digte blaredek van die eeu-oue Melkhoutbome skep 'n anderwêreldse atmosfeer waar 'n mens jou amper kan verbeel jy hoor die sagte fluisteringe van jare se geheime. Dis 'n wonderwêreld waar die immer-veranderende kleure, geure en nuanses van see, berglug en wilde diere en plante jou meesleur op 'n nimmereindigende ontdekkingsreis.
 
Kom ontdek dié Eden te voet, te perd of per 4x4-voertuig. Ons gidse sal jou begelei op 'n onvergeetlike toer wat jou asem sal wegslaan!
 

4 x 4 Blommekyk-Safari's

Grootbos 4 x 4 Drives

Ons begeleide stap- en 4x4-roetes neem jou nie net deur skilderagtige Melkhoutwoude en berglandskappe nie, maar ook deur 'n deel van die bekroonde Kaapse Blommeryk waar meer as 750 seldsame fynbosspesies, 250 voëlspesies en 'n magdom soogdiere, reptiele en insekte aangetref word.