Navrae Hier

Strande om van te kies en te keur

Die Gansbaai-kuslyn is 'n wonderlike, ongerepte wêreld van eindelose wit strande, kranse, klowe en verruklike rotsformasies wat iets vir elkeen bied. Die kuslyn strek oor 50 km vanaf Walkerbaai langs die Danger Point-skiereiland en Franskraal tot in Pearly Beach. Dit is 'n paradys vir hengelaars, sonsoekers en natuurliefhebbers wat die ongeskonde vryheid van die natuur bo volgepakte kommersiële vakansie-bestemmings verkies. Knus genestel tussen bergreekse, inheemse fynbosvlaktes en seldsame plant- en dierespesies, bied dié omgewing ook 'n magdom geleenthede vir buitelug-avonturiers en voetslaners wat unieke staproetes soek.

'n Strand vir elke gier en plesier

Grootbos-gaste kan ons spesialis-gidse vergesel op onvergeetlike perdry- en staptoere op enige van die strande in die omgewing. Die Plaat is 'n uitgestrekte strook strand van 17 km in die Walkerbaai Natuurreservaat wat tussen De Kelders en die Kleinrivier-monding in Hermanus strek. Dié strand is ideaal vir lang, verkwikkende wandelings en pieknieks en ook een van die beste plekke om die Suidelike Noorkapper-walvisse van die land af te bekyk. Tussen Julie en Desember wemel die see van dié elegante reuse wanneer hulle al die pad van Antarktika af kom om in Walkerbaai se beskutte baaitjies te paar, geboorte te skenk en hul kleintjies touwys te maak. Dis 'n ongelooflike gesig om dié reuse-diere se manewales 'n klipgooi van die strand af dop te hou terwyl die son oor Walkerbaai sak in 'n skouspel van kleure.

Somer, son en saffier

Die pragtige rotsformasies, grotte en rotspoele langs die kuslyn van Die Plaat maak dit ook 'n gewilde plek vir rots- en strandhengel. Die eindelose wit strand en sandduine is ideaal vir alle strand- en watersportaktiwiteite. Skulpe, swartmossels en seldsame voëlspesies soos die Swart Tobie kom ook volop langs dié kuslyn voor. 

Die gebied het ook 'n ryk geskiedenis. In die fynbos-bedekte sandduine is dolomietrotse en versteende fossiele van 'n geskatte 25 miljoen jaar oud gevind. Die Plaat grens ook aan die wêreldbekende Klipgat-grotte waar die mens se voorsate reeds in die Steentydperk tussen 70 000 en 80 000 jaar gelede gewoon het.
 
Kom geniet die vars seelug en ongeskonde strande van dié omgewing en klink 'n glasie van ons eie wyn op die asemrowende sonsondergange oor Walkerbaai! Grootbos se gidse neem jou op 'n ongelooflike ontdekkingsreis deur 'n wonder-wêreld waar die ekologie en getye van die magtige oseaan steeds die mens se gang bepaal.